ლონდონის “ჩელსის” აღმასრულებელი დირექტორ პიტერ კენიონის განცხადებით, კლუბის ხელმძღვანელობა, ზაფხულის სატრანსფერო პერიოდში, შემადგენლობის გასაძლიერებლად სოლიდურ თანხას გამოჰყოფს.
ამის შესახებ, Sky Sports-ი იტყობინება.
“ზაფხულში გუნდში რამდენიმე ახალი ფეხბურთელი გამოჩნდება. თუმცა ჩვენ, ხარისხის თვალსაზრისით, სატრანსფერო ბაზრის მეტად ვიწრო სექტორს ვიკვლევთ და სიმართლე იქნება ვთქვა, რომ ფეხბურთელთა არცთუ დიდ წრეს განვიხილავთ. “ჩელსი” ეძებს მოთამაშეებს, რომლებსაც ვარსკვლავებად ჩამოყალიბების პოტენციალი აქვთ. როცა ჩვენს გუნდში მყოფ ფეხბურთელებს გადახედავ, მათზე უკეთესის პოვნა იოლი ნამდვილად არ არის. ბოლო სეზონმა დაამტკიცა, რომ ჩვენი შემადგენლობა ერთ-ერთი საუკეთესოა. ამიტომ, საუბარია ზუსტ მშენებლობაზე და არა გარდაქმნაზე. დარწმუნებულნი ვართ, რომ გუნდის ლიდერების შენარჩუნებას შევძელებთ”, – აცხადებს კენიონი.
ბრიტანული პრესის ინფორმაციით, კლუბის მფლობელი რომან აბრამოვიჩი მზად არის, ტრანსფერებში 100 მილიონი ევრო დახარჯოს. სატრანსფერო ბაზარზე “ჩელსის” უმთავრეს სამიზნეებად, “მილანის” ნახევარმცველი კაკა და მადრიდის “რეალის” ფორვარდი რობინიო სახელდებიან.
როგორც ცნობილია, “ჩელსის” მთავარი მწვრთნელის, ავრაამ გრანტის თანამდებობაზე დარჩენა-არდარჩენის საკითხი ორშაბათს გაირკვევა, თუმცა, ბრიტანელ ჟურნალისტთა ნაწილი უკვე ირწმუნება, რომ “არისტოკრატებს” ახალი სეზონიდან “ბარსელონას” ყოფილი თავკაცი, ფრანკ რაიკაარდი გაუძღვება.