ლონდონის “ჩელსისა” და ინგლისის ეროვნული ნაკრების ნახევარმცველმა ფრენკ ლამპარდმა ჩემპიონთა ლიგის ფინალური მატჩის შემდეგ, შესაძლოა, მილანის “ინტერთან” გააფორმოს კონტრაქტი. ამის შესახებ სააგენტო AP-ი იტალიურ პრესაზე დაყრდნობით იტყობინება. ლამპარდის ტრანსფერით დაინტერესებას ადასტურებს “ინტერის” პრეზიდენტი მასიმო მორატიც. უფრო მეტიც, “ნერაძურის” ხელმძღვანელი აცხადებს, რომ მისი კლუბის ინტერესის სფეროში ინგლისის ნაკრების კიდევ ერთი ნახევარმცველი, “ლივერპულის” კაპიტანი სტივენ ჯერარდიც იმყოფება. “ორივე ფეხბურთელი საუკეთესოა, თუმცა მათი შეძენა ძნელი იქნება, განსაკუთრებით ჯერარდის. რაც შეეხება ლამპარდს... ვნახოთ. მდგომარეობა სატრანსფერო ბაზარზე დიდად იქნება დამოკიდებული ჩემპიონთა ლიგის ფინალზე” – აცხადებს მორატი. ამავდროულად, ლამპარდის აგენტი სტივ კლარკი აცხადებს, რომ მისი კლიენტის მომავლის შესახებ გადაწყვეტილება ზაფხულში იქნება მიღებული, ჩემპიონთა ლიგის ფინალის შემდეგ კი, ლამპარდს გარკვეული დროის განმავლობაში, ფეხბურთისგან დასვენება სურს. “ფრენკს ოთხშაბათს მეტად საპასუხისმგებლო მატჩი ელის, რომლის შემდეგაც მას დრო დასჭირდება, რათა ოჯახთან ერთად იყოს. მას ამის საშუალება არ ჰქონია მას შემდეგ, რაც დედა გარდაეცვალა. ფრენკმა გარკვეული დროით ფეხბურთისგან უნდა დაისვენოს და პირად ცხოვრებაში გაერკვეს, ფეხბურთში საკუთარ მომავალს იგი ამის შემდეგ გადაწყვეტს” – აცხადებს კლარკი.
