ლონდონის “ჩელსის” ყოფილმა თავკაცმა აბრაამ გრანტმა, რომელიც კლუბიდან გასულ შაბათს დაითხოვეს, “არისტოკრატთა” მთავარი მწვრთნელის თანამდებობაზე გატარებულ 8 თვეში 8 მილიონი ფუნტი სტერლინგი მიიღო.
ამის შესახებ ბრიტანულიThe Times-ი იტყობინება.
ლონდონური კლუბის სპორტული დირექტორის თანამდებობაზე ებრაელი სპეციალისტის ანაზღაურება წლიურად 980 ათას ფუნტ სტერლინგს შეადგენდა, ხოლო მას შემდეგ რაც იგი გუნდის მთავარი მწვრთნელი გახდა, მისი ხელფასი 2,8 მილიონ ფუნტამდე გაიზარდა. იმის გამო, რომ “ჩელსისა” და გრანტს შორის მოქმედი კონტრაქტის გაწყვეტა კლუბის ხელმძღვანელობის ინიციატივით მოხდა, მწვრთნელმა “არისტოკრატებისგან” დამატებით, კომპენსაციის სახით, 5,2 მილიონი მიიღო, ანუ ჯამში - 8 მილიონი ფუნტი სტერლინგი.
აღსანიშნავია, რომ აბრაამ გრანტის სამწვრთნელო კარიერაში აქამდე ყველაზე მაღალანზღაურებადი სამსახური ისრაელის ნაკრების მთავარი მწვრთნელის პოსტი იყო, სადაც მას წლიურად 100 ათას ფუნტს უხდიდნენ.