საფრანგეთის ფეხბურთელთა ეროვნული ნაკრების თავდამსხმელი ნიკოლა ანელკა თვლის, რომ ლონდონის “ჩელსიში” არასათანადოდ იყენებენ. ამის შესახებ, ფრანგული სპორტული გამოცემა L'Equipe-ი იუწყება. “ჩელსიში” მოსვლიდან დღემდე, ჩემს საფირმო პოზიციაზე, ანუ მეორე ცენტრალურ თავდამსხმელად არასოდეს მითამაშია. ხან მარჯვენა ფლანგზე მაყენებდნენ, ხან - მარცხენაზე. აქამდე, არავისთვის არაფერი მითქვამს, რადგან გუნდში ახალი ფეხბურთელი ვიყავი. მომავალ სეზონში, ახალწვეული აღარ ვიქნები. ლონდონურ კლუბში გადმოსვლის დროს, მითხრეს, რომ “ჩელსი” 4-4-2 სისტემით ითამაშებდა და მეორე ფორვარდის როლი დამეკისრებოდა. აქ ფლანგზე სარბენად არ მოვსულვარ. ჩემი აზრით, დიდიე დროგბასთან ერთად კარგი ტანდემის შექმნა შემიძლია. თუმცა, ამაზე ვარჯიშზეც კი არ გვიმუშავია” - განაცხადა ანელკამ. ჩემპიონთა ლიგის ფინალში, “მანჩესტერ იუნაიტედთან” შეხვედრის დროს გაცუდებული პენალტის თაობაზე, ფრანგმა ფორვარდმა შემდეგი თქვა: “სათადარიგოთა სკამზე 110 წუთი ვიჯექი, ხოლო შემდეგ, მოსათელად ერთი წუთი მომცეს და მოედანზე გამომიშვეს. მგონი, არასწორია მოთელვის გარეშე ასეთ დაძაბულ თამაშში ჩართვა. მკითხეს, მსურდა თუ არა პენალტის შესრულება პირველ ხუთეულში, რაზეც ვუპასუხე - პრობლემა არ არის, მთელი დრო მარჯვენა მცველის პოზიციაზე ვირბინე და ახლა გსურთ, რომ პენლტი დავარტყა?.. საბოლოო ჯამში, თერთმეტმეტრიანის ნიშნულთან მისვლა მეშვიდეს მომიწია”.
