ინგლისის “ჩელსის” ებრაელმა მთავარმა მწვრთნელმა აბრაამ გრანტმა, ჩემპიონთა ლიგის ფინალში “მანჩესტერ იუნაიტედთან” მატჩისშემდგომ თერთმეტმეტრიანების სერიაში მარცხის შემდეგ, საკუთარი გუნდი შეაქო, განსაკუთრებით კი, გუნდის კაპიტანი ჯონ ტერი აქო, რომელმაც გადამწყვეტი, მე-5 თერთმეტმეტრიანი გააფუჭა და თავის გუნდს თასის მოპოვების შანსი დაუკარგა.
ამის შესახებ, Reuters–ი იუწყება.
“ვამაყობ ჩემი გუნდით და იმით, რასაც ამ სეზონში მივაღწიეთ. ამის შესახებ, ფეხბურთელებს გასახდელშიც ვუთხარი. დღეს, ჩემმა გუნდმა უკეთ ითამაშა და გამარჯვებას ვიმსახურებდით, თუმცა ამის მიუხედავადაც, მიმაჩნია, რომ დიდებული სეზონი ჩავატარეთ”, – თქვა გრანტმა.
მატჩისშემდგომი თერთმეტმეტრიანებისას, ტერი ბოლო, მე-5 დარტყმას ასრულებდა და გოლი რომ გაეტანა, თასი “ჩელსის” დარჩებოდა, მაგრამ მას ფეხი დაუცდა და ბურთი კარს ააცილა. ამის შემდეგ, “მანჩესტერის” მეკარე ვან დერ სარმა, ნიკოლა ანელკას დარტყმა მოიგერია და თასის მფლობელი “მანჩესტერი” გახდა.
“ტერი ძლიერ დამწუხრებულია, ტირის და ვერ ვაჩერებთ, თუმცა, უმეტესწილად, სწორედ მისი დამსახურებაა, ფინალში რომ მოვხვდით. “ჩელსის” რთული სეზონი ჰქონდა, ის კი ,გუნდს მაქსიმალურად ეხმარებოდა და მუდამ იმას აკეთებდა, რაც გუნდს ესაჭიროებოდა. მან თავად გადაწყვიტა გადამწყვეტი თერთმეტმეტრიანის დარტყმა, ის დიდებული ფეხბურთელი, ნამდვილი კაპიტანია და დიდებულადაც ითამაშა”, – აღნიშნა გრანტმა.
შესაძლოა, ტერის გადამწყვეტი თერთმეტმეტრიანი არ შეესრულებინა და ეს მისია დიდიე დროგბას ეკისრა, მაგრამ, მე-2 დამატებული ტაიმის მიწურულს, მსაჯმა ლუბოშ მიხელმა ის ნემანი ვიდიჩზე სახეში დარტყმის გამო გააძევა. ამის შესახებ, გრანტმა თქვა, რომ დროგბა მოედანზე აღარ იყო და ახლა ამაზე საუბარს აზრი აღარ აქვსო.