ინგლისის “ჩელსის” გულშემატკივრებმა 2008 წლის სეზონის საუკეთესო ფეხბურთელად ნახევარმცველი ჯო კოული აღიარეს. ამის შესახებ, საფეხბურთო კლუბ “ჩელსის” გულშემატკივართა ოფიციალური ვებ-გვერდი იუწყება. გუნდის ფანების მიერ ვებ-გვერდზე ჩატარებულ გამოკითხვაში, ჯო კოულმა პორტუგალიელ მცველ რიკარდუ კარვალიოს და გერმანელ ნახევარმცველს მიხაელ ბალაკს აჯობა. ფეხბურთელს ჯილდო “ჩელსის” ყოფილმა კაპიტანმა ფრანგმა მარსელ დესაიმ გადასცა. სეზონის განმავლობაში საუკეთესო გოლად, “სტემფორდ ბრიჯზე” ჟულიანუ ბელეტის მიერ “ტოტენჰემის” კარში 35 მეტრიდან გატანილი ბურთი დაასახელეს. “Chelsea TV”-ის სახელით, ბრაზილიელს პრიზი კლუბის ისტორიაში საუკეთესო ბომბარდირმა ბობი ტამბლინგმა გადასცა. აღსანიშნავია, რომ ფეხბურთელებმა და სამწვრთნელო შტაბმა, მიმდინარე სეზონში საუკეთესოდ, კარვალიო დაასახელეს, რომელიც საგანგებო პრიზით გუნდის ექს-კაპიტანმა რეი უილკინსმა და კლუბის ოფიციალური სპონსორის “Samsung”-ის პრეზიდენტმა კიმმა დააჯილდოვეს. სპორტული ეკიპირების მწარმოებელი ფირმის - Adidasis მიერ, სეზონის საუკეთესო ახალგაზრდა ფეხბურთელისთვის დაწესებულ ჯილდოს, წელს მფლობელი არ აღმოაჩნდა. სამაგიეროდ, ამ პრიზის ღირსი “ჩელსის” 18-წლამდელთა გუნდი გახდა. ლონდონელთა ყოფილი ფეხბურთელისგან, გრემ ლე სოსგან პრიზი ახალგაზრდული გუნდის კაპიტანმა ნანა ოფორი ტვუმასიმ და გუნდის მწვრთნელმა პოლ კლემენტემ მიიღეს. ინგლისის მორაგბეთა ნაკრების ყოფილმა კაპიტანმა ლოურენს დალალიომ, განსაკუთრებული მიღწევებისთვის დაწესებული პრიზი, “ჩელსის” ნახევარმცველ ფრენკ ლამპარდს გადასცა. “ჩელსის” შემადგენლობაში ინგლისის თასისა და ევროპის თასების თასის გამარჯვებულმა ჯონ დემპსიმ, ლონდონელთა კაპიტან ჯონ ტერისგან, პრიზი კლუბის მიერ მის მიმართ გამოხატული განსაკუთრებული პატივისცემისთვის მიიღო. დემპსი ლონდონელთა შემადგენლობაში 1969-1978 წლებში თამაშობდა, ხოლო კარიერის დასრულების შემდეგ, ბავშვთა სახლს ხელმძღვანელობდა.