ინგლისის “ჩელსის” გერმანელი ნახევარმცველი მიხაელ ბალაკი იმედოვნებს, რომ პრემიერლიგის ბოლო ტურში, “უიგანი” “მანჩესტერ იუნაიტედის” დასამარცხებლად მაქსიმუმს გაიღებს და მის გუნდს ჩემპიონობის მოპოვების შანსს მისცემს. ამის შესახებ ბალაკმა Sky Sports-ისთვის მიცემულ ინტერვიუში განაცხადა. “დაძაბულობა იზრდება და იმედი მაქვს, რომ “უიგანი” ჩემპიონატის დასკვნით შეხვედრაში ბოლომდე იბრძოლებს. როდესაც ჩვენ “უიგანს” სტუმრად ვეთამაშეთ, მატჩის მიწურულს მასპინძლები მოედანზე 4 ფორვარდით თამაშობდნენ. იმედი მაქვს, ისინი “მანჩესტერ იუნაიტედთანაც” მსგავსი განწყობით ითამაშებენ. მართალია, “უიგანმა” პრემიერლიგაში დარჩენა უკვე გაინაღდა, მაგრამ მათ ამ ფაქტის აღსანიშნავად საკმარისი დრო ექნებათ, მერე კი მანჩესტერელებთან სათამაშოდ მოემზადებიან” - თქვა ბალაკმა. პრემიერლიგის უკანასკნელი ტურის წინ, “ჩელსის” და “მანჩესტერ იუნაიტედს” თანაბარი რაოდენობის ქულები აქვთ. ლონდონელებს ჩემპიონის ტიტულის მოსაპოვებლად, საკუთარ მოედანზე “ბოლტონის” დამარცხება მართებთ, თუმცა, პარალელურ შეხვედრაში “მანჩესტერმა” “უიგანთან” ქულები უნდა დაკარგოს.