დღეს, პნევმონიით, ინგლისის საფეხბურთო კლუბ ლონდონის “ჩელსის” ნახევარმცველის, ფრენკ ლემპარდის დედა გარდაიცვალა. ამის შესახებ, სააგენტო АР იუწყება. აღნიშნული ფაქტის გამო, სავარაუდოდ, ფეხბურთელი შაბათს, “მანჩესტერ იუნაიტედთან” მატჩში მონაწილეობას ვერ მიიღებს და შესაძლოა, მან მომავალ კვირაში “ლივერპულთან” ჩემპიონთა ლიგაში განმეორებით მატჩში მონაწილეობაც ვერ მიიღოს. ლამპარდის დედა, პეტ ლამპარდი, რომელიც 58 წლის იყო, პნევმონიის მძიმე ფორმით, საავადმყოფოში 10 დღის წინ მოათავსეს.
“ლამპარდი მადლობას უხდის მწვრთნელ აბრაამ გრანტსა და “ჩელსის” პერსონალს, მისთვის ასეთ მძიმე პერიოდში მხარდაჭერისთვის. კლუბში ქალბატონ პეტს ახლოს იცნობდნენ. იგი შვილს, პრაქტიკულად ყველა მატჩში გულშემატკივრობდა, სადაც არ უნდა ჩატარებულიყო. ქალბატონი პეტი, “ჩელსიში” ყველას მოენატრება”, – ნათქვამია კლუბის ოფიციალურ განცხადებაში. აღსანიშნავია, რომ დედის ავადმყოფობის გამო, ლამპარდმა პრემიერლიგაში “უიგანთან” და “ევერტონთან” შეხვედრები გამოტოვა. “ჩესლის” ფეხბურთელის მიმართ თანაგრძნობა, “ლივერპულის” მთავარმა მწვრთნელმა რაფაელ ბენიტესმაც გამოხატა: “ლამპარდს საკმაოდ რთული პერიოდი უდგას. მითუმეტეს, ასეთი საპასუხისმგებლო მატჩების წინ. ჩვენ მისი გამხნევება გვსურს”.
