მილანის ერთბაშად ორი გრანდი - “ინტერი” და “მილანი” ლონდონის “ჩელსის” თავდამსხმელის დიდიე დროგბას ხელში ჩასაგდებად იწყებს ბრძოლას. ეს ინფორმაცია იტალიური სპორტული მედიისთვის არც ერთი ზემოხსენებული კლუბის ოფიციალურ პირს არ მიუწოდებია. დროგბა მილანურ კლუბებს პრესამ ლეგენდარულ ჯანლუკა ვიალის მიერ მიწოდებული ინფორმაციის შედეგად დაუკავშირა. თუმცა, “ნერიაძურის” ნავთობმაგნატი პრეზიდენტი მასიმო მორატი კატეგორიულად უარყოფს ამ ეტაპზე კოტდივუარელი თავდამსხმელით დაინტერესებას. თუმცა, გადაკვრით აღნიშნავს, რომ არ არის გამორიცხული, მომავალი სეზონიდან დროგბა მართლაც “ინტერის” მაისურით ვიხილოთ.

“ჩვენი გუნდის თავდასხმის ხაზით კმაყოფილები ვართ და ჯერჯერობით დამატებითი ფორვარდი არ გვჭირდება. მით უმეტეს, რომ მალე ადრიანოც დაგვიბრუნდება. რაც შეეხება დროგბას, ის ჩვენს გეგმებში ჯერ არ შედის, მაგრამ თუ ლონდონელები მის გაყიდვას გადაწყვეტენ, შეიძლება დავფიქრდეთ ამ საკითხზე”, - აღნიშნა “ინტერის” პრეზიდენტმა “ფიორენტინასთან” გამართული მატჩის შემდეგ, რომელიც მილანელთა გამარჯვებით 2:0 დასრულდა. “შავ-წითლები” კარგა ხანია თავდამსხმელის ძიებაში არიან. ერთ-ერთი ვერსიით, “მილანის” პრეზიდენტ სილვიო ბერლუსკონის გუნდში ანდრეი შევჩენკოს დაბრუნება უნდა, თუმცა გუნდის ტიფოზები უკრაინელის “სან სიროზე” დაბრუნებას აპროტესტებენ. ასე რომ, გამორიცხულია ბერლუსკონი გულშემატკივართა ნებას დაჰყვეს და შევჩენკოს ნაცვლად გუნდში სხვა რომელიმე მაღალი რანგის თავდამსხმელი მოიყვანოს. ასეთთა შორის კი, როგორც უკვე გითხარით, “ჩელსის” ფორვარდი დიდიე დროგბა სახელდება. “ინტერისგან” განსხვავებით, კოტდივუარელით დაინტერესებას არ მალავს “როსონერის” ვიცე-პრეზიდენტი ადრიანო გალიანი: “დროგბა მართლაც ერთ-ერთი იმათგანია, ვინც მომავალ სეზონში შეიძლება “სან სიროზე” ვიხილოთ. როგორც ვიცი, მას “ჩელსიში” დარჩენა აღარ სურს და ახალ გუნდზე ფიქრობს. მოლაპარაკებები ამის თაობაზე არავისთან წამოგვიწყია, თუმცა როცა ამის დრო იქნება, აუცილებლად მივაკითხავთ დროგბას აგენტს”. “მილანის” ხელმძღვანელობა კიდევ ერთ სიახლეს გვპირდება - წარუმატებელი სეზონის შემდეგ, შესაძლოა, განახლებული სეზონიდან გუნდში ვეღარ ვიხილოთ ჯენარო გატუზო.