ადრიდის რეალი ახალი ფეხბურთელით დაინტერესდა. საინფორმაციო წყაროების მტკიცებით, ზაფხულში ბლანკოსის ერთერთი უმთავრესი სამიზნე ჩელსის ნახევარმცველი, მიქაელ ესიენი იქნება. ფეხბურთელის აგენტსა და სამეფო კლუბის წარმომადგენლებს შორის მოლაპარაკება უკვე დაწყებულია.

 ჩელსი-ფენერბაჰჩეს თამაშს პრედრაგ მიატოვიჩიც დაესწრო, რომელიც ესიენის ფასით დაინტერესდა და პიტერ კენიონისაგან სავარაუდო სატრანსფერო თანხის ოდენობაც გაიგო: 35 მილიონი ევრო. პედია აღნიშნული თანხის გადახდაზე თანახმა ყოფილა. რეალი ზაფხულში მამადუ დიარას გაყიდვას აპირებს და მიღებული თანხით სამეფო კლუბს სწორედ ესიენის შეძენა სურს.

 კლუბის დატოვებას თავად განელი ფეხბურთელიც აპირებს. ჟოზე მაურინიოს წასვლის შემდეგ, მიქაელს ლონდონში გული აღარ უდგება და სტემფორდ ბრიჯის დატოვებაც ამიტომ გადაუწყვეტია. თითქმის გადაწყვეტილია დიარას წასვლის საქმეც, ფეხბურთელის აგენტი, ფედერიკ გუერა აცხადებს, რომ მალელის ბედი ელ-კლასიკოს შემდეგ გაირკვევა. “ყველაფერი ელ-კლასიკოს შემდეგ გაირკვევა”, - აცხადებს გუერა. “ჩემი კლიენტი მადრიდში ყოფით ბედნიერი არაა. მას მცირე სათამაშო დრო აქვს. ამიტომ მამადუ წასვლით იმუქრება.”.

ესიენის შეძენა ბერნდ შუსტერსაც ნდომებია და მიატოვიჩისათვის ამ ტრანსფერის განხორციელება უთხოვია. როგორც ჩანს, გერმანელი სპეციალისტი დიარას დიდი თაყვანისმცემელი არასდროს ყოფილა და გუნდში ახალი საყრდენის მოყვანა ამიტომ გადაწყვიტა. შეგახსენებთ, რომ მიუხედავად უკანდახეული პოზიციისა, მიქაელ ესიენს გოლების გატანაც კარგად შეუძლია. განელს პრემიერლიგის წლევანდელ სეზონში 24 მატჩში 6 გოლი აქვს. გარდა ამისა, ესიენი უნივერსალიზმით გამოირჩევა. შეუძლია სხვადასხვა პოზიციებზე თანაბრად კარგად თამაში და ევროპის ერთერთ უძლიერეს საყრდენ ნახევარმცველად ითვლება.