ინგლისის “ჩელსის” ნახევარმცველი ფლორან მალუდა დარწმუნებულია, რომ ჩემპიონთა ლიგის პირველ ნახევარფინალურ შეხვედრაში, მისმა გუნდმა “ლივერპულთან” მატჩის ფრედ დასრულება დაიმსახურა, რადგანაც თამაშის ბოლო წუთებზე პეპე რეინას კარზე დიდი ზეწოლა მოახდინა. ამის შესახებ მალუდამ უეფას ოფიციალურ საიტს განუცხადა. “ძალიან კარგია გასვლაზე გოლის გატანა რომ მოვახერხეთ. ჩვენ ბოლო წუთამდე ვიბრძოლეთ და მთელი ძალით ვცდილობდით ანგარიშის გათანაბრებას. მართალია, საპასუხო გოლი რიისემ თავის კარში გაიტანა, მაგრამ ჩვენ ეს დავიმსახურეთ, რადგანაც “ლივერპულს” შეცდომის დაშვება ვაიძულეთ” - ამბობს მალუდა. ივერპულში გამართული ჩემპიონთა ლიგის პირველ ნახევარფინალში, “ლივერპული” 43-ე წუთზე კუიტმა დააწინაურა, თუმცა, 95-ე წუთზე რიისემ ბურთი საკუთარ კარში გადაგზავნა და შეხვედრა 1:1 დასრულდა. “ჩელსისა” და “ლივერპულის” განმეორებითი შეხვედრა, ლონდონის “სტემფორდ ბრიჯზე” 30 აპრილს გაიმართება.