ინგლისური “ჩელსის” გოლკიპერმა კარლო კუდიჩინიმ, შესაძლოა, ახალი სეზონიდან ტურინის “იუვენტუსში” ითამაშოს.

როგორც გამოცემა Tuttosport-ი იტყობინება, “იუვენტუსის” მთავარ მწვრთნელ კლაუდიო რანიერის იმედი აქვს, რომ ყოფილ შეგირდთან კონტრაქტის გაფორმებას ზაფხულის სატრანსფერო პერიოდში შეძლებს.

 ბებერი ქალბატონის” ხელმძღვანელები მომავალი სეზონისთვის გუნდის შემადგენლობის სერიოზულად გაძლიერებას გეგმავენ, რათა ერთდროულად წარმატებულად იასპარეზონ როგორც სერია A-ში, ასევე ჩემპიონთა ლიგაში. კუდიჩინი კი, ჯანლუკა ბუფონის შემცვლელად მოიაზრება, რადგან რანიერი გუნდის ამჟამინდელი სათადარიგო გოლკიპერ ემანუელე ბელარდით უკმაყოფილოა.

34 წლის კუდიჩინი “არისტოკრატთა” რიგებში 1999 წლიდან გამოდის, თუმცა 2004 წელს, “სტემფორდ ბრიჯზე” პეტერ ჩეხის მისვლის შემდეგ, პირველი ნომრის სტატუსი დაკარგა და მას შემდეგ ძირითად შემადგენლობაში თამაში იშვიათად უწევს. იტალიელ გოლკიპერს ლონდონელებთან კონტრაქტი კიდევ 4 წლით აკავშირებს, თუმცა სამშობლოში დაბრუნებით თავადაც არის დაინტერესებული.

კუდიჩინის კლაუდიო რანიერის ხელმძღვანელობით 4 წლის განმავლობაში უმუშავია, როცა 2000-2004 წლებში ტურინელთა ამჟამინდელი თავკაცი “ჩელსის” წვრთნიდა.