ლონდონის “ჩელსის” კაპიტანმა ჯონ ტერიმ ტრავმის გამო, შესაძლოა, ჩემპიონთა ლიგის ფინალში “მანჩესტერ იუნაიტედის” წინააღმდეგ თამაში ვერ შეძლოს. ამის შესახებ უეფას ოფიციალური ინტერნეტ-გვერდი იტყობინება. “არისტოკრატთა” მცველმა “ბოლტონთან” პრემიერლიგის ბოლო ტურში, თანაგუნდელ პეტერ ჩეხთან და მოწინააღმდეგე კევინ დევისთან შეჯახების შედეგად იდაყვი დაიზიანა, რის გამოც მე-14 წუთზე მოედნის დატოვება მოუხდა. “ჩელსის” თავკაცის ავრაამ გრანტის განცხადებით, ჩემპიონთა ლიგის ფინალში ტერის თამაშის შანსები დეტალური სამედიცინო შემოწმების შემდეგ გახდება ცნობილი. ამავე შეხვედრაში დაშავებული “ჩელსის” ფორვარდი დიდიე დროგბა კი, სავარაუდოდ, სეზონის უმნიშვნელოვანეს შეხვედრამდე გამოჯანმრთელებას მოასწრებს. “ჩელსისა” და “მანჩესტერ იუნაიტედს” შორის ჩემპიონთა ლიგის ფინალური დაპირისპირება 21 მაისს, მოსკოვში გაიმართება.