მთავარი » 2008 » მაისი » 2 » ჩემპიონთა ლიგის ფინალის ბილეთის მფლობელები რუსეთში უპრობლემოდ მოხვდებიან
ჩემპიონთა ლიგის ფინალის ბილეთის მფლობელები რუსეთში უპრობლემოდ მოხვდებიან
19:09
რუსეთის ხელისუფლება მიმდინარე წლის 21 მაისს მოკოვის “ლუჟნიკებზე” გასამართი ჩემპიონთა ლიგის ფინალისთვის, ბილეთების მფლობელებს რუსეთში შესვლის პროცედურას მნიშვნელოვნად გაუმარტივებს. ამის შესახებ, ფინალთან დაკავშირებით გამართულ სპეციალურ პრესკონფერენციაზე მატჩის კოორდინატორმა ალექსეი საროკინმა განაცხადა. საროკინის გარდა, პრესკონფერენციას ესწრებოდნენ მოსკოვის ვიცე-მერი ვალერი ვინოგრადოვი და ფინალისტი გუნდების წარმომადგენლები - ინგლისის “მანჩესტერ იუნაიტედის” გენერალური დირექტორი დევიდ გილი და ლონდონის “ჩელსის” აღმასრულებელი დირექტორი რონ გურლეი. “ჩვენ მივაღწიეთ შეთანხმებას და ფინალზე დასწრების მსურველთათვის რუსეთში შემოსვლა მნიშვნელოვნად გამარტივდება. უახლოეს პერიოდში, შეთანხმების ყველა წვრილმანის შესახებ შეიტყობთ” - თქვა საროკინმა. მოსკოვის ვიცე-მერმა აღნიშნა, რომ ქალაქის ხელმძღვანელობამ უეფას ყველა მოთხოვნა დააკმაყოფილა. “სტადიონზე საკმარისი რაოდენობით მილიციელები იქნებიან, რათა თავიდან ავიცილოთ რუსი და ინგლისელი გულშემატკივრების შეტაკება, ასევე “ჩელსისა” და “მანჩესტერის” ფანებს შორის, რაიმე გაუგებრობა. სტადიონის მიმართულებით, ქალაქის სხვადასხვა წერტილიდან 700 ავტობუსი და 200 მინი-ავტობუსი იმოძრავებს, მეტრო კი ღამის 4 საათამდე იმუშავებს” - განაცხადა ვინოგრადოვმა. გილმა იმედი გამოთქვა, რომ ეს დღე ფეხბურთის გულშემატკივრებს კარგი თამაშით დაამახსოვრდებათ და არა მოედნის გარეთ მომხდარი შეტაკებებით. “მოსკოვში ბრიტანელი პოლიციელები ჩამოვიდნენ, რომლებიც მჭიდროდ ითანამშრომლებენ რუს სამართალდამცავებთან. დარწმუნებული ვარ, რომ ეს მატჩი კარგი ფეხბურთით დაგამახსოვრდებათ და არა მოედნის გარეთ მომხდარი ინციდენტებით” - დაამატა “მანჩესტერის” გენერალურმა დირექტორმა. დღეიდან, “ლუჟნიკებზე” ბუნებრივი მინდვრის საფარის დაგების სამუშაოები გაგრძელდა.
რუსეთის ხელისუფლება მიმდინარე წლის 21 მაისს მოკოვის “ლუჟნიკებზე” გასამართი ჩემპიონთა ლიგის ფინალისთვის, ბილეთების მფლობელებს რუსეთში შესვლის პროცედურას მნიშვნელოვნად გაუმარტივებს.